BAMMATA kutimua vumbi tarehe 23 Uwanja wa Uhuru

Posted On: Thursday, 21st February 2019

Baraza la Michezo ya Majeshi Tanzania (BAMMATA), limesema kuwa michezo ya majeshi Tanzania itaanza kutimua vumbi tarehe 23 mwezi huu katika Uwanja wa Uhuru jijini Dar es Salaam.

Akizungumza na Waandishi wa Habari leo Makao Makuu ya Jeshi la Ulinzi la Wananchi wa Tanzania (JWTZ) Upanga jijini Dar es Salaam Mwenyekiti wa Baraza hilo Brigedia Jenerali Suleiman Mzee amesema kuwa jumla ya Kanda saba zitashiriki katika Michezo hiyo.

Kwa mwaka huu michezo ya BAMMATA inashirikisha kanda saba (7) ambapo timuza michezo mbalimbali zinatoka ndani ya kanda hizo. Kanda zinazoshiriki mwaka huu ni Ngome, JKT, Polisi, Magereza, SMZ (Idara Maalumu), Uhamiaji, Zimamoto na Uokoaji.

• Mashindano hayo yatashirikisha mchezo wa mpira wa miguu (Football) wanaume, mpira wa mikono (Handball) wanaume na wanawake, mpira wa wavu (Volleyball) wanaume na wanawake, mpira wa kikapu (Basketball) wanaume na wanawake, ndondi wanaume na ulengaji shabaha wanaume na Wanawake.
• Lengo la mashindano hayo ni kuibua na kukuza vipaji, kuendeleza elimu ya viungo na utimamu wa mwili, kuendeleza uhusiano, urafiki na udugu baina ya Majeshi ya Ulinzi, Usalama na Idara Maalum za Serikali ya Mapinduzi Zanzibar na Wananchi kwa ujumla.
• Pamoja na malengo hayo pia kushirikiana na mabaraza ya michezo ya Taifa na mashirikisho ya michezo ya kitaifa na kimataifa ili kuendeleza michezo katika Majeshi, kuendeleza na kudumisha sera ya Taifa kuimarisha timu zilizomo ndani ya kanda za BAMMATA.
• Mgeni rasmi katika ufunguzi huo ni Makamu wa Pili wa Rais wa Serikali ya Mapinduzi Zanzibar Balozi Seif Idd. Michezo ya BAMMATA ilianza rasmi mwaka 1977 na kuendelea kufanyika mpaka hivi sasa.